О.Цогтгэрэл: Гишүүдээ хоёр өрөө байраар шагнадаг эрх баригч нам бизнесийн байгууллага уу

УИХ дахь Ардчилсан Намын бүлгээс өнөөдөр/2023.12.18/ хэвлэлийн хурал зохион байгууллаа.

АН-ын бүлгийн дарга, УИХ-ын гишүүн О.Цогтгэрэл “Монгол Улс сүүлийн жилүүдэд эрх баригчдын бодлогын үр дүнд бүхий л салбарт хомсдолын социалист системд морилж байна.Эрх баригчдын зүгээс явуулж байгаа арга хэмжээ бодлогууд гоёор хэлбэл хачирхалтай. Өглөө нь эрчим хүч тасарна гэснээ орой нь тасрахгүй болчихлоо гэдэг. Бензин шатахуун тасрах чимээгээр хангалттай байгаа гэдэг, нэг сайд нь татвар нэмнэ гэхэд нөгөө нь нэмэхгүй гээд нэгдмэл бодлого алга.УИХ-ын дарга нь индэр дээрээс үл үзэгдэх далд хүчний тухай яриад иргэдээрээ таавар таалгаад сууж байна.Хотын дарга нь 12 цагийн дараа дүрэм журмыг өөрчилж тээврийн хэрэгслийг улсын дугаарын тэгш, сондгой хязгаарлалт хийнэ, сургууль хичээллүүлнэ, хичээллүүлэхгүй гэх юм. Эрх баригч нам бизнесийн байгууллага уу. Гишүүдээ хоёр өрөө байраар шагнана гээд олон нийтийн сүлжээгээр цацагдаж байсан. Системийн авлига хомсдолын социализмаар илэрч гарч байна гэж үзэж байна” гэв.