У.Хүрэлсүх: Ард түмэн, төрт ёсоо хүндэтгэхгүй бөхийн цолыг буцааж авч болно

Монгол Улсын Ерөнхийлөгч У.Хүрэлсүх Монголын үндэсний бөхийн холбооны удирдлагуудыг хүлээн авч уулзав.

Монголын төрт ёсны үнэт өв, уламжлал болсон үндэсний бөхөө дээдэлж, ирээдүй хойч үедээ өвлүүлэн үлдээх, үзэгч түмнээ хүндэлж байхын тулд үл ойлголцлоо нэг мөр эцэслэхийг Монгол Улсын Ерөнхийлөгч анхааруулав. Ялангуяа удахгүй болох Сар шинийн баярын болон цаашид зохион байгуулах бөхийн барилдаан ямар нэг маргаангүй байх ёстойг санууллаа.

Мөн Үндэсний их баяр наадмын тухай хуулийн нэмэлт, өөрчлөлтөд үндэсний бөхийн маргаантай асуудлыг хэрхэн шийдвэрлэх талаар тусгах, ард түмнээ үл хүндэтгэдэг, ёс суртахуунгүй бөхчүүдийн цолыг хураах хүртэл арга хэмжээ авдаг болгох нь зөв гэж үздэгээ хэллээ.

Бөхчүүд өндөр ёс зүйтэй, ухамсартай байж, төр, ард түмэн, өв соёлоо эн тэргүүнд тавьж байхыг үргэлж сануулж, зөвлөж, тусалж байхыг санууллаа.

Ерөнхийлөгч У.Хүрэлсүх “Цар тахлын хүнд хэцүү, бухимдалтай цаг үед ард түмнээ улам их бухимдуулах зүйлийг яагаад хийгээд байгаа талаар та бүхнээс асуумаар байна. Та бүхэн ард түмний өмнө хэрэлдэж, талцдаг асуудлаа шийд. Энэ чинь эргээд Монгол бөхийн нэр хүндийг унагааж байна. Ард түмэн, төрт ёсоо хүндэтгэхгүй бол өгсөн цолоо Монголын төр буцааж авч болно. Өөрийн бяр чадлаараа авсан байж болно. Гэхдээ ард түмэн хүндэтгэхгүй бол тэр цолыг хүртэж явах нэр хүнд байхгүй болно” гэв.

Монголын үндэсний бөхийн холбооны удирдлагууд үндэсний бөхийн асуудалд анхаарал хандуулж буйд нь Монгол Улсын Ерөнхийлөгчид талархал илэрхийллээ. Үндэсний бөх бол соёл уламжлал, үнэт зүйл бөгөөд төр, ард түмний өгсөн цол, хүндлэлийг даахгүй бол цолыг нь хураадаг болох шаардлагатайг дэмжиж байгаагаа хэлэв.

Мөн холбогдох байгууллагуудтай хамтран ёс зүйн хариуцлага, сэргээш зэрэгтэй холбоотой зохицуулалтыг журамд нарийвчлан тусгаж Засгийн газраар батлуулах, улмаар хуульд нэмэлт, өөрчлөлт оруулах чиглэлээр ажиллаж байгаагаа танилцууллаа.