Үндсэн хуулийн нэмэлт өөрчлөлтийг Ерөнхийлөгчид танилцууллаа
Үндсэн хуульд оруулсан нэмэлт өөрчлөлтийг УИХ-ын дарга Г.Занданшатар Ерөнхийлөгч У.Хүрэлсүхэд биечлэн хүргэж танилцууллаа.
Энэ үеэр Ерөнхийлөгчийн тамгын газрын дарга Я.Содбаатар УИХ-ын тамгын газрын дарга Л.Өлзийсайхан нар Үндсэн хуулийн нэмэлт өөрчлөлтийг эх хувьд оруулж, тамга дарах ажиллагааг зохион байгууллаа.
МОНГОЛ УЛСЫН ҮНДСЭН ХУУЛЬД НЭМЭЛТ, ӨӨРЧЛӨЛТ ОРУУЛАХ ЖУРМЫН ТУХАЙ ХУУЛЬД НЭМЭЛТ ОРУУЛАХ ТУХАЙ:
18.11. Монгол Улсын Үндсэн хуулийн холбогдох зүйл, хэсэг, заалтыг хүчингүй болгосноос хойш ажлын хоёр өдрийн дотор Монгол Улсын Их хурлын дарга Монгол Улсын Ерөнхийлөгчид биечлэн хүргэж, танилцуулна.
18.12. Монгол Улсын Ерөнхийлөгч танилцсанаас хойш ажлын гурван өдрийн дотор “….оны..дугаар сарын..-ны өдөр Монгол Улсын Үндсэн хуульд оруулсан өөрчлөлтийн уг эх мөн болой. Монгол Улсын Ерөнхийлөгч…..” гэсэн гарын үсэг зурж, төрийн тамга дарж баталгаажуулан Монгол Улсын Үндсэн хуулийн уг эхийн хамт хадгална.
18.13. Монгол Улсын Ерөнхийлөгчийн нотлон баталгаажуулсан уг эхийг Монгол Улсын Үндсэн хуульд байршуулж, “Төрийн мэдээлэл” эмхэтгэлд нийтлэх бөгөөд түүнийг албан ёсны эхэд тооцно.
