Хугацаат цэргийн алба хаагчдын орчин нөхцөлийг бүрэн шинэчилж байна

Батлан хамгаалахын сайд, Зэвсэгт хүчний Жанжин штабын даргын шийдвэрээр Зэвсэгт хүчний нэгтгэл, ангиуд хугацаат цэргийн алба хаагчдынхаа орчин нөхцөл, цэргийн байр, тэр дотроо амрах байрыг бүрэн хэмжээнд засварлан шинэчилж, ор, дэр, хөнжлийг нь шинээр хангаж, түрүүч, байлдагч бүрийг хувийн хэрэгцээний зүйлсээ хадгалах шүүгээтэй болгохоор ажиллаж байна.

Одоогоор нэгтгэл, ангиуд 29 цэргийн байрны барилгыг засварлах ажлыг ид өрнүүлж байгаа аж. Тухайлбал, гадна засвар, дотор засвар, шугам сүлжээ, дээвэр, шүршүүр, бие засах өрөө зэрэг бүрэн хэмжээний урсгал засварыг хийж байна. Тус урсгал засварыг тавдугаар сарын 15-ны өдөр эхлүүлжээ. Улмаар зуны улиралдаа багтаан дуусгахаар Зэвсэгт хүчний нэгтгэл, ангийн алба хаагчид ажиллаж байна.

Батлан хамгаалах яам, Зэвсэгт хүчний Жанжин штабын зүгээс энэ онд хугацаат цэргийн алба хаагчдын алба хаах орчин нөхцөлийг сайжруулах чиглэлээр хэд хэдэн томоохон ажил төлөвлөсний нэг нь энэхүү засвар, шинэчлэлийн ажил юм. Цэргийн байрны барилгын засварын ажил дуусахтай зэрэгцүүлэн шинээр хангалтаар нийлүүлэх ор, дэр, хөнжил, шүүгээг ЗХЖШ-аас нэгтгэл, ангиудад тээвэрлэн хүргэнэ.